dibebaonline
عزيزي العضو مرحبا بكم ... المنتدى ما زال بالف خير جدد نشاطك بمشاركاتك ®§§][][ dibebaonline][][§§®~
لا تنسى عند دخولك الصـلاة عـلى الرسـول عليه الصلاة والسلام

dibebaonline

من هنا يكون التواصل الحقيقي
 
الرئيسيةالبوابةاليوميةس .و .جبحـثالتسجيلالمجموعاتدخول
شريط التهانئ والاعلانات العاجلة والهـامـة
- كوني كشجرة الرمان في خضرتها ، طيبة في ثمرها ، جميلة في زهرها .2 ـ كوني قوية الإرادة .3 ـ خذي قراراتك الإيجابية بنفسك .4 ـ انهلي من العلم ما استطعت .5 ـ حافظي على سمعتك فإنها كالزجاجة يستحيل إصلاحها إذا ما انكسرت.6 ـ لا تغرك الكلمات المعسولة فقد تكون فخا لك .7 ـ كوني حذرة من العلاقات عبر الشبكة الإلكترونية ( الانترنت ) .8 ـ لا تركضي وراء الزواج بل اجعلي مميزاتك هي التي تهيأ لك فرص ذلك .9 ـ غذي أنوثتك بالطرق السليمة .10 ـ ابتعدي عما يشين لك ولعائلتك .11 ـ لتكن ثقتك بنفسك عالية .13 ـ لا تكثري من الشكاوى .14 ـ اهتمي بغذاء الروح والعقل .15 ـ كوني متعاونة محبة للخير .16 ـ دافعي عن وطنك .17 ـ حافظي على علاقتك بأفراد عائلتك ـ .
*لا إله إلا الله الحليم الكريم**لا اله إلا الله العلى العظيم**لا اله إلا الله رب السماوات السبع و رب العرش العظيم**اللهم إنا نسألك زيادة في الدين**وبركة في العمر**وصحة في الجسد**وسعة في الرزق**وتوبة قبل الموت**وشهادة عند الموت**ومغفرة بعد الموت**وعفوا عند الحساب**وأمانا من العذاب**ونصيبا من الجنة**وارزقنا النظر إلى وجهك الكريم**اللهم ارحم موتانا وموتى المسلمين واشفي مرضانا ومرضى المسلمين**اللهم اغفر للمسلمين والمسلمات والمؤمنين والمؤمنات الأحياء منهم والأموات*****اللهم ارزقني حسن الخاتمة**اللهم ارزقني الموت وأنا ساجد لك يا ارحم الراحمين**اللهم ثبتني عند سؤال الملكين**اللهم اجعل قبري روضة من رياض الجنة ولا تجعله حفرة من حفر النار**اللهم إني أعوذ بك من فتن الدنيا**اللهم أني أعوذ بك من فتن الدنيا**اللهم أني أعوذ بك من فتن الدنيا**اللهم قوي إيماننا ووحد كلمتنا وانصرنا على أعدائك أعداء الدين**اللهم شتت شملهم واجعل الدائرة عليهم**اللهم انصر إخواننا المسلمين في كل مكان**اللهم ارحم إبائنا وأمهاتنا واغفر لهما وتجاوز عن سيئاتهما وأدخلهم فسيح جناتك***وبارك اللهم على سيدنا محمد صلى الله عليه وسلم*
احبتي واخواني في الدبيبة داخلها وخارجها وكل غيور على الدبيبـة ، نامل منكم أن و معاودة نشاطكم هنا في هذا المنتدى لتستمر المسيرة والتعاون بنفس الحماس من اجل الدبيبـة هيا همتكم معانا

شاطر | 
 

 واحة الشعر السوداني

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : 1, 2  الصفحة التالية
كاتب الموضوعرسالة
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: واحة الشعر السوداني   الأربعاء أبريل 15, 2009 10:42 am

هذه الصفحة سأحاول أنزل فيها كل درر الشعر السوداني فكل من يريد المشاركة فليقدم ما عنده حتي نجمع اكبر كمية من روائع الشعر السوداني الأصيل


ا
لمجموعة الأولي : الشعر القصصي الواقعي



جواب للبلد


ضــــل الـضـحـى الــرامـي ..‏
وشــمــس شــتـويـة دفــايـة ..‏
وريـحة الـبن ، لـما يـفوح فـي قلاية..‏
وفــــــــروة جـــــــدي .‏
صـورة جـدي لـمن جـيت أمـد يـدي :‏
‏(جــــدي.. أديــنـي تـعـريـفة )..‏
‏(بـتـقرا الـحـمدو يــا الـمـبروك )..‏
‏(بـقـرها وشــان تـعـريفه الـقـاه)..‏
بــجـود فـــي الـقـراية كـمـان ..‏
وايـــه يـــا يـمـة والله زمــان !!‏
وســبـحـة ( بــنــت الــفـكـي)‏
والــطــوريـة .. والـــواســوق..‏
وسـعف حـبوبة ، والـكورية ، والحنقوق
وصــوت ( سـعدية ) بـت جـيرانا ...‏
تـشـحـد لـيـهـا فـــي طـايـوق.‏
وصـوت (عرفه) لما تخمج الدلوكة غناية...‏
وحـبـة فـريـك ، لـموه لـي رمـضان
مــصــرور فـــي مـخـلايـة ...‏
صــــور مــحـفـورة جــوايــا.‏
ومــــــــن يـــــــوم داك..‏
ولـــي الـلـيـلة ، ولـــي iiبـكـرة
وبــــعــــد بــــاكــــر..‏
شــان الـزمن غـدار ومـا مـعروف..‏
زمــــــــن مــــكــــار ،
زمـانـا كـلـو خــوف فــي خـوف
وايـــه يـــا يـمـة والله زمــان !!‏
مـشـتاق يـمـه لـي مـلاح الـنعيمية..‏
وريــحــة صــاجـك الـمـحـروق
ولـــمــا تــســوي طـعـمـيـة
وغـــــبـــــاشــــة روب ،
وعــــنــــزة حــــلــــوب
بـــدور أرجـــع أجـيـكي هـنـاك
ضــاقـت بــيـا يــا يـمـه هـنـا
بــــدور أتــمـسـى بـعـيـونـك
وأصـابـحـك يـــا حـبـيـبتي أنــا
صــبـاح الـخـير عـلـي عـيـونك.‏
اتـــاري الـدنـيـا مــن دونــك...‏
شـيـنـة ومـــرة مـــا بـتـنـدار
ومــــرة مـــرارة يـــا يــمـه
دي مـــرة وحـــارة زي الــنـار..‏
ولو بتدوري احكيلك كيف أحوالي في البندر ،
مـــن ويـــن عـايـزة ابـدالـك ؟؟
مـــو شـيـتـا غـريـب وعـجـيب
ده شـيـتا كـلـو شـيـن فــي شـيـن
هــنـا الـــزول الـعـديل ونـصـيح
وحــاتـك انـــت يـــا الـغـالـية
بـــعـــيــش حـــيــاتــو...‏
يــومــاتـي بــــي وشــيــن..‏
وزولــتــي الــحـتـي حـبـيـتها .‏
لـقـيتها بــراي ، تـحـب زولـيـن .‏
وايـــه يـــا يـمـه والله زمــان !!‏
دي قــشـة عـيـنـى مـــن الـنـوم‏
مــعـاي بـشـيـل هــمـوم بـاكـر
قـبـل مــا أشـيـل هـمـوم الـيوم!!‏
أخــتـهـا خــطـواتـي الأولـــى
أعــــــــدي الــــبـــاب..‏
تــبـدا تـــدق طــبـول الــهـم..‏
خــواطــر تــذهـل الألــبـاب !!‏
وأقـابـلـك يـــا شــوارع الـجـن..‏
وفـــي جــوايـا حــاجـة تــئـن‏
أشـــد وتـــر الـحـزن وأعــزف
تــمـوت غـنـواتـي يـــا يــمـه
ويـخـنـقـني الــغـنـا وأنــــزف
وتـنـتـر فـــي الــعـروق حـمـى
خــيـال بـيـتـنا الـقـديم يـرجـف
صـــــور تــنــزاح وتــتـلـم
وتـــنــاي وتــالــت آيــمــه!‏
واشــوفـك بـــي خــيـال حـالـم
تــشــاوري وتــرقـص الـسـبـحة
مــلامــح الــعـابـد الــصـايـم
تــشـع فـــوق جـبـهـتك سـمـحة
وشـيـيـك يـحـاكي ضــي الـنـور.‏
مـــزدان يــمـه فـــي الـطـرحة
وتـــبــســمــي لــــــــي
امـــــــــد إيـــــــــدي
أقـــول أتــلاقـى يــا الـسـمحة ..‏
يــتـلاشـى الــحـلـم وأصــحـى
ويـــدفــق عـــــرق مــالــح
ويـسـكـن فـيـنـي كـــل الــهـم
واشـــم ريــحـة نـــدم جــارح
وارفـــس عـصـفـورة مـنـجـرحة
فــارقــت الــفـضـاء الــبـارح..‏
وتــنــاي وتــالــت آيــمــة !!‏
وهـــم كـــل الـمـدايـن وهــم ..‏
وهـم غـرقانة فـي زخـم الـحضارة الغم
حــضــارة بـتـحـصد الإنــسـان
وتـــزرع فـــي مـكـانـه نــغـم
وقـصـد الـقـول.. يــا شـايل الـلوم
ويــمــا جــابـنـي لـلـبـنـدر .‏
وحــاتـك إنـــت يـــا الـغـالـية
ده يــــومــــا شـــــــوم...‏
ولا بـسني الـخجل مـن راسي لي كرعي
شـــايـــلــو وأحـــــــوم..‏
وهــادي الـحـالة فــي (الـخـرتوم)‏
زي عــايــش شــقـي ومـهـمـوم


عدل سابقا من قبل ashrafbrkat في الأربعاء أبريل 15, 2009 11:51 am عدل 1 مرات
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 10:48 am

شعر / محمد الحسن سالم

قوز الرماد


الضو وجهجهة التساب
وداها فوق قوز الرماد
كان ظنّ يوم .. يومين .. تلاتة
الموية تنزل والبحر يشرد شراد
يفضل ترا
يبراهو بالسلوكة من ورا
والعيوش والخير يعم .. يرقد رقاد
والناس تخم خم السرور .. وماهو البرا
ناساً كتار .. فاكرين كدي
يومين .. تلاتة .. الحالة ترجع حالتا
ويبنوا البيوت هو وشفعوا .. وأم العيال
وينجمعوا .. ويسترجعوا الذكرى وشتاتات السواد في صالتا
شيتاً ضحك .. شيتاً بكي
ويبقى الخراب ده رهاب .. رهاب
عبرة وحكاوي بتنحكي
بلدك متل كمين بلاد .. بدت الدقون فيها الختا
نجّس ثراها المسرفين .. كترت مواعين الفساد .. وكان كلمة الإسلام غُتا
جات اللّت الله .. وشالتا
كان ظن يوم .. يومين .. تلاتة .. مشى السبوع .. والتاني جا
والموية كل ما ليل تزيد .. بيقل رجا
وقوز الرماد الكان قريب .. فات بعيد .. بقى ما بتخوج
قوز الرماد يا الضو فضل .. جزيري ضارب فيها موج
حصار .. حصار .. كيف النجا
عاين البلد دي دمار .. دمار .. فيها إيش فضل
لعبة قصب في إيدين طفل
الحيطة وكتينا التقع .. تقع ألف وجعة على الضلع
دخانا يمرق في السما .. آهاتو تنزف في الأرض
بحر الصبر والإحتمال بيناتن إنقطع ترع
لا يلقى يربط لا يحل
لا حولة يا الكتب .. الكراريس المكرنة في الشتل
التختة .. أقلام الرصاص .. كنب المدارس كور يلوج
باب الفصل كاسحبو موج
لا قوة يا ورق الجرايد .. يا المصاحف
والصحيحات المطفحي في الزبل
ورافعين دواليبن بعيد .. طابلين خوازيقن طبل
لا حولة حال .. ما بتنقبل
يا مسلمين .. وين لي تساب عشرة .. وتساب كم واربعين
ده يمين خراب كمين سنة
يا الضو منو الفي الكون بصدق كان هنا
ليلة ذكر .. حلقة مديح .. دارة غنا
هيصة ورقيص
القرمصيص
سيرة عريس .. وحلاة عروسو محننة
يا الضو منو الفي الكون بصدق كان هنا
شفّع بيلعبو جنب بعض .. ديك لِفّتُن في الدشي غبشي مشكنة
واللا الشتل خايف لها .. فارد جرايدو وحاضنا
فيق ... لا تضيق
بات الفريق بهجي ومتمسحة بألمي .. وين يا الضو نقاقير الهنا
وينن مشاوير الفرح .. غزل البنات .. الهودنة
حش البراسيم العصر .. الليل ونستو الشيطنة
وعند الفجر .. كم ميضنة
وهذر التلاميذ الصباح .. بي جنب رواكيب الحلب
يا الضو بيوت الناس .. حياتا مبشتنة
الحلِّي كلها في البحر
كسر البحر .. ؟
واللا انتحر ؟
قلب المياه إنكبّ قبلك وحدك
ضاداك في بلدك .. شردك
نفدت قوافل الأغنياء .. جملك على الحصحاص برك
مرتاح حمامن في البروج
وإنت اب حماماً طاش يلوج
لا سوى عش .. لا ركّ ركْ
يا الدنيي كيف متقلبنة
تصحى العصافير الوديعة مع الصباح متخلقنة
شر الكلاب متمسكنة
وين (جنرتا) وهوهيوا وين ؟ الليلي غابْ
كلب الجناين زيو زي كل الكلابْ
كلب الغلابة المستغلين العبيد .. الليلي سيد ريس مهاب
كلب أب زهانة تهينو هانة .. من المهانة تقول له تكْ
حكم إنقلابات التساب .. دوارة دنيا فرندقس
ننجارى فيها صبق صبق .. نخسر بعض في هين تراب
نتلاوى عِنْ فتح اللبق .. فاكرين برانا أهل العقاب
تاري البحر عوافي عندو معانا حق
يا الدنيي زي سكرة وتفك .. من راسو فك
بعض المسافات إتلغت
الفارغي طمبجا .. والملاني إتفرغت
الدندهوبات زي بعض .. شكل العديدي ورصّها
نفس العناقريب نفسها
عفشك ده .. حق غيرك تشك
يدخل في بالك ألف شك
ما الحالة أصلاً من بعض
كل إنقلابات التساب .. الدنيي كلها حلتك
تنضم مع الفي آخر البلد .. من غير تفوتا محلتك
تحكيلو قصة تقصها
إن نفسو فيها تحسها
إن ماها فيها تحسها
حتى الأحاسيس نفسها
ما الحالة كلها من بعض
إلا المساخيت الدقون .. ختوها بين أهلك قرض
بالدين وبالطين بالنسب
بالمايكرفونات بالخطب
بالبنطلونات بالرتب
(فرق تسد)
تاخد قناديلك تفوت .. وإنكتلو في حزمة قصب
ويوم التصد .. تلقى البيوت في أزيارها باني العنكبوت
والحزمة شاهد في الترب
حرسك يظمبر منها
وفرسك يكد..لا أسيدها تسأل عنها.. ولازول يرد
أرخيلى أضانك يابلد
مرة أسمعينى من البعيد وإنطارشينى وللابد
فى حبلى ماتت شتلتى .. مات بيتى ماتت حلتى
لكنى يوم مات إتولد جواى الف إنسان جديد
وانا ذاتى من ذاتى إتولد
ورتنى ملتى ملتى
والمويه بدلت الوجوه
يابلدى من بيتك تتوه
تضهب ضهب
لو بابو مافى أو العتب
تحسبلو من قوز الرماد
أو بيت أمير المؤمنين اللسة حيطو تسوى رب رب در.. درب
والدندهوب إندك دك
هرس القزاز .. الموية جاز .. والجاز ودك
بينو الدقيق إتلك لك
ضلف الدواليب الكبار .. عايمات خشب
المكحل .. الكتشنة .. ميزان الدهب
ضوق الغضب
ضوق المذلة الدستبا الناس العزاز
سدك دخرنالو المطر .. اما إنت يكفيك الرذاذ
ويجى الجراد ... ويجى الجراد
خدرت تاني يجي الجراد
أقوى الحقيقة من المجاز .. وهنا المحك
يا أرزقي .. يا نسل حمالة الحطب
يا مستفيد من بزة أطفال السواد الما نزل فوقن ملك
بالسكر .. العيش .. السماد
الموية أولى من العباد ؟؟
في يات كتاب دين .. يات حديث
يا فاجر الله بيسألك
يا حسرة الإنغشى فيك .. كبر وراك .. جاهد جهاد لامن هلك
يا حسرة الصدق صلاتك وموعظاتك في الفساد .. بان الشرك
ايواتا لك .. ايوة ايوة يا بحر التساب .. ما أعدلك
شكراً جزيلاً يا بحر .. رغم الكساد
بحت لنا العفن المكرن في الزمن من عهد عاد
والضو وليداً ما قرا .. خرجتو منك باقتصاد .. قانون .. فلك
جف المداد .. ما أعدلك .. ما أعدلك .. ما أعدلك
بالسكر.. العيش .. والسماد
الموية أولى من العباد ؟؟
يا شارع الثورة القصاد أهلي المسالمين البعاد
يا بندقيتو .. هنا المحك
قبل على القبلة ونده
قبال يمد إيدي إنتبه
حس المطر بين الشدر
والضو مع الفيها إنشده
برة المطر .. في الدندهوب برضو المطر
خت البرش فوق راسو .. لكن المطر أوووو والهوا
راس تمرة فوق عفش المسيكيني الجريد
رمى دندهوبا العدي فاتت بالبحر
برش الصلاة اللافحو الهوا
إبريق يترتر بين كرر
يا الله .. ستها في السفر
والضو ينط من دندهوبو يجيبو صاد صوت المطر
في إيدو كوز .. سبحي .. وككر
حلة ملاح .. كراس غنا .. إعلان قضية .. علم طلب
برواز قديم ..
حاضن عروس وعريس وسيم .. بين كم نفر
السبحة والكوز مو اللتا .. تشبه أمير المؤمنين
باكر يقولو سرقتها .. فننن .. يفنها في البحر
أقوى البحر ؟؟ واللا المطر ؟؟ أو الرياح
بتصحي في الجو الجراح
بتحت من الجوف الفكر
يشفي الوعر
عش قمري بي فرخينو كان من حظ ورر
يا رازق الحيوان أخو ..
الينجا من كيد البحر .. ما ينجي من إيد المطر
والينجا من إيد المطر .. ما ينجى من كيد الرياح
والينجا من كيد الرياح .. ما ينجي من كيد الفقر
يي دي القدر.. يي ده القدر
ما أعتى حربك يا بشر
إنت الغريب .. والموج يشيل غادي ويجيب
وينكربش النيمة الدبيب
والضو مو جايب لك خبر
طق .. دندهوب ناس ستي نور .. عودو انكسر
وفات بالبحر
تحت السموات مافي إرض
في الموية .. في الريح .. في المطر
في الدابي .. في التمر الختر
إنسان يطق قبل السنة .. عراقي والوشي .. والشعر
غير وقفتو .. الدندهوب زالف هبر
يا غيمة هووووي .. ده وكت مطر
وارتج جوف الجو رعد .. يا الضو كفر؟؟
يا الضو كفر ؟؟
من بعد ما نفد الصبر .. والإحتمال في الجوف دشر
صن المطر .. والجو صفا
بنقر حجر بت الرسول .. لكن بعد ما الضو كفر
ضربت شعاعات الشمس .. في دوشة فوق قوز الرماد
كلبة مديني .. نعيجتا
ديك العجوز .. وكديس عماد
وطيرة بقر .. ودحيش غريب
شوف الظروف .. دحشك .. حمارتك والضيوف
قلعن .. يحفتن في الرماد
بالسكر العيش السماد
الموية أولى من العباد ؟؟
وبالفيتريتي العيش حكم
الموية أولى من البكم ؟؟
وملص العريريقي ولباسو .. ومصرن
ما غيرن
خمخم عقاب الكسرة واللابري القديم
من دندهوبو المنتكل .. في النيمة شال باقي الأكل
خم الدبيب في القفة مو جايب خبر
خم الرياح .. خم المطر .. خم الجراح
لفالو فرعين منقة بالمنجل هبر
حشحش صبايتاً هن صفر


الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 11:26 am

الشاعـــر / الفرجوني

الحاج ود عجبنا




عمنا الحاج ود عجبنا
في الفريق ياهو الركيز
هو البشيل حمل الرباعة
عندو كلمة على الجماعة
في الفريق باقيلينا آية
للضعيف تلقاهو ساند
ويقهر الكعب المعاند
للضيوف ديوانو فاتح
ديل يقوموا وديل يدخلوا
يا ولد جيب الرتاين
جيهوا الديوان فراشو
وأفرشوا الفرشة الكبيرة
والأباريق والتباريق
وأضبحوا الحمل المدوعل
D D D D D
عمنا الحاج ود عجبنا
من سنين أيام جهلتو
ديمة في دعوة صلاتو
بسأل المولى السلامة
وسترة الحال والكرامة
وعمنا الحاج ود عجبنا
في ليلة من ذات الليالي
في زمن حظر التجول
جاهو ضيف فوق راس حداشر
رحب الحاج بيهو جداً
فرشولو ونزلوه
وكاسو للعشا ما تلقالو
ما الرغيف ممحوق مقصر
والبلد في حال معسر
وعمنا الحاج فيما بالو
وجبة الضيف زي فريضة
وهسي ضاقت بي العريضة
وضيفوا كيف إترك عشاهو
D D D D D
وجاتلو فكرة
يمشى للفرن المجاور
للجان العيش يشاور
بس عشا الضيف يا جماعة
ضيفي نازل ليهو ساعة
شاكلوه ودفروه ونهرهوه
وجاتو دورية الطوري
وأمسى بايت في الحراسة
D D D D D
وناسو جنو للصباح ما عرفوا حاجة
وين ده روح ؟؟؟
وجاهن الخبر المؤكد
ود عجبنا في الحراسة
ماشى دورية الطواري
ناسو أولادو وبناتو
راحوا دورين محكمة الطواري
فيها في نص الخلايق
شافو حالاً ما هو لايق
عمنا الحاج بي جلالو
فوقوا حس السوط يولول
فوق قفاهو فوق ذنودو
فوق رجولوا
ومره فوق فججاً حشايل
أصلو ما قيل بهوناً
حتى كان نزان عجايب
إلا لكن الليالي هي البترخص كل غالي
D D D D D
حاكموا الولد المنصب
كتفوا بالدبور مقصب
أنت يا حاج يا مخالف
زول مخرف وعقولوا تالف
أنت يا زول ما كا داري
زلة الناس في الطوارئ
أ جلدوه غرموه
ونفذوا الحكم البهينوا
شان يفتح تاني عينو
D D D D D
تسمع الصوت صيحتو داوية
تسمع السوط ليهو خاوية
فوق قفة الشيخ صيحتوا داوية
وفجأة رفع الحاج عيونو
شاف بنات ولدو وبناتو
كلهن واقفات يعاينن
دمعتين في العين ترقرق
والحزن بينن مفرق
ده النجوم الفي سماهن
ده الزمان الكان حماهن
كل سوط نازل عليهو
من شعاع الضو عماهن
عمك الحاج دمعوا سرف
سيلوا فوق اشنابو سرب
تمه حكموا وراح بيوتو
نفسوا مكسورة وذليلة
كيف ملاقاة الحليلة
وصحوة الروح العليلة
في البيوت الجوه غادي
عمك الحاج ما إعتيادي
فوقو متلمين جماعتو
والسكيلي ضرب حزايني
قالوا ناداهو المنادي
فارق الدنيا المسيئة
يقطع الزلة وسنينها
فوق فراش حاج ود عجبنا
بسمع الزول البوصي
أقفلوا الحوش يا جماعة
وطفوا أنوار الرتاين
داك حرس حظر التجول
من بعيد ليكم بعاين
يا زمن حظر التجول
يا زمن حظر التجول
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 11:37 am

كلمات الشاعر / عبد الفتاح عبد الرحمن محمد ( شايقي )

أعيشك من سكات

مابدخلك
وأنا في زقاقاتك حلم
مفطوم علي وعداً قضي
وقلباً سهي
وزمناً هوان
مابحلمك
وأنا في المنام
لسع بشطف خوفي من
طلعة بهاك
واخوفي
لو صحت الصباحات أفقدك
مابرسمك
وأنا أيدي في طين النوي
وعيوني من زحمة مخاوفك
تندهك
بقبل أعيشك من سكات
أفهم إجاباتك همس
أكسر دوايتي معاك عمد
وأقصد أحجيك بالغنا
ما الزيي لو خيل في رهان
مابتكسبك
........
بتوسلك
تدي المراكب ريح صلاح
تهديها كلما الليل دهم
ترمي الصباح قدام خطاي
تبريها في درب العشم
وأنا بنتظر غيمتك تصل
لو تنبهل في بور غناي
أنا ببقي في دنياك نغم
....
وأتحسسك
من تاني أبدا أحسسك
بالكان مدسدس في الفؤاد
بالكان محكر في القلب
من كم سنة
ريد ياحبيبة وكلو ليك
شوق للبريدة ومااكتفيت
غنا ياجميلة بيوصفك

ومن تاني ارجع أدخلك
وفي حلمي أقدر أرسمك
...
وإستأذنك
أدخل عليكي حلم جميل
أدخل عليك من ألف باب
من ألف شارع ضو جديد
...
بستأذنك
أبهل دوايتي عليك غنا
وأرسم ملامحك في الغيوم
ما إنتي لي أول سراب
وأنا ما إنجهرت من النهار
لكني بدفع ليك عمر
مافيهو غير الإنتظار
والحرقة والشوق الشديد
........
بستأذنك
أرويك فرح
وأشرق جداولك بالنشيد
وإتدفقك في كل صباح
وإتونسك كل يوم جديد
........
ياجاهلة مابي من حريق
ياصامتة والجوف بيك يقيد
سويني في بالك حلم
أو في خيالاتك مكان
تلقيني كلما الريح تنوح
مشرع بيديكي الأمان
.....
بستأذنك
ماتحزني
لا الغربة تسرق فرحتك
لو في بعادك كنت طيف
أشواقي ليك فرس الرهان
.....
يالجاية من ضو الشموس
وأنا في ظلامي عليك بكوس
لاكنتي زي نار المجوس
لابتشبهي الزيك كمان
.....
بتوسلك ماتسدي باب
أنا من دروب الريح بجيك
وإستأذنك
شان أدخلك
وأرسم ملامحك من جديد
عصفورة أو طفلاً سعيد
راكوبة أو ظلاً مديد
قمرية في غابة نخيل
طورية أو منجل في إيد
تمرة وشديرة برتكان
شادوف علي الجرف البعيد
خلوة وتسابيح في الآذان
إبريق وسبحة وكم مريد
وأستأذنك
شان أدخلك
وأبداكي من أول جديد
الرجوع الى أعلى الصفحة اذهب الى الأسفل
الرملي
عضو ممتاز
عضو ممتاز


ذكر عدد الرسائل : 83
Personalized field :
اكسب مع ثلاثية روان : 3
تاريخ التسجيل : 28/02/2009

مُساهمةموضوع: رد: واحة الشعر السوداني   الأربعاء أبريل 15, 2009 11:39 am

كلام يا عوض دكام
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 11:41 am

يا محسنين لله



قومة من النباه ما ضاقلو قوت الفاه
غير كلمتين فى اليوم إعتادن الحلقوم
من الصباح للنوم يا مـحسنين لله
تبدأ الصباح بالآه ومنك زمن تواه
وتتمسى يا الله من شدة المأساه
ترقد رفقت الشاه حالاً صعب رضاه

جواها صوت مخنوق ما بيسمعوا المخلوق
وبالاً شتيت ممحوق وأنه أسى وخاذوق
بحت لسان مريوق ينادى مـعـتـصـمـاه
يا محسنين لله
حبل المروه الكان ممدود من الجيران
وأعـمـــامـه والخلان بالمطرقة وسندان
يا حليل رجلنا زمان بس فضلو الأشباه

قبال ثلاثة سنين يتمت من الوالدين
ومن بعـــــدو بسنتين راح الكفيل وحنين
خلا لها دمعة عين وخلا لها خمسة أفواه


صبارة قادرة تطيق كل الآلم والضيق
وتغلب نشاف الريق والمصلا والابريق
وقلبـــاً وفى وصـــــديق لا ضل يوم لا تاه

إلا الصغيرونين يتبـــــاكو هم دايرين
فى لحظة وحين مـا بيعوفـوا المن وين
والحــوجة سيفه سنين يقتل رقاب الجاه

سالت دموع أنهار جسر الصمود إنهار
عارفى العدم جبار مر ما بيراعى صغار
إلا الفقر مـو عار بس للوجوه شواه

ضايقى العذاب كم نوع وعارفى السؤال ممنوع
شبعانه فوقو الصوع ورويانه نوح ودموع
الله يجازى الجوع كم كم حنالو جباه

تب يا زمن مـحاق من ضلك الرقـــــاق
يا قاسى يا فراق يا اللى الفرح سراق
حنضل أساق دقاق مـا بيحملنو شفاه

عطش السنين فى الجوف طرد السئم والخوف
فرش دواخلى حـروف روينا بالمعــــــــروف
ولا قلة المصـــــــروف لا الحـــــوجــة تتوطاه
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 11:52 am

بــلد الغبش



يا راحلى لبلد الغش شيلينى فى خاطرك نغيم كان القى لى هناك عش
وارجع معاك انا ياطيور .. خلف الزمن كين سنة
اتمد فى امل الوصال .. وارحل معاك سرب المنى
وانزل هناك انا فوق تقى ..واطاطه يابسى مشققه
كانت مسقية بالغنا .. وليك ياطيور كانت وطن كانت رخا وخيرادن
.................
اطرا البلد وناس البلد ..ليل البلد وصبح البلد
لو عارفى يا الفاردى الجناح انا بي شوق ماليه حد
للنيمى والضل الرهيف .. والنسمة والسعن والبرد
لى لوبى فى صدر الجروف .. والنيل من الحيضان شرد
.................
لى ابوى فوق برش الصلاة .. فرش طرف توبه ورقد
لى مرقة القيت العصير .. قاصد سبيل الخير قصد
لى لحظة من عمر الزمان لا حسرة لا هم لا حرد
.................
آهـ يا طيور واشوقى انا .. انا ياطيور مشتاق كتير
ما لى جناح متلك انا .. لو لى جناح انا كت بطير
وانزل قصاد بير الفريق .. لى شوفت الواردات عصير
وامسك دلو الرايقى واجر .. واملالها وابراهن غفير
لامن خلاص هن يوصلن .. وانا تانى اواصل للمسير
.....................
اوصل هناك حد الترب .. واقعد قصاد جدى الكبير
اضحك من الشبه الشديد .. بين حظى والليل والمصير
واذكر الزمن البعيد .. وكتيت ابوى الحاج سعيد
يقلعلو فى انتاى كانت .. قايمالها فى حوضا جديد
......................
وانا ذكرة الناس العزاز تلقانى فى نومة الدغش آهـ يا طيور آه
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 11:56 am

محمد والغربة



محمد فى الغربة تايه حصادو اللمه أوجــاعه
وجـداول دمعو البتجرى مغلبى ديمه قراعـــه
ضهب فى لحظة وصولو المدن ماعارف طباعه
وكت سالمه مد إيدو مطنشه مدت كراعـــــه
كتم آهة غلب تكتل صنوف الامو وأنواعــه
وكسح راجع بى خيالو طرا التحنان والوداعه
خرير النيل المتسب سماحة الناس والزراعه
أنين ساقة تنوح مريكبا مفرود جناحــــــــــه
لقمة لـو حتى بايته تشيله الناس بى قناعــه
وقليلة مكسور خشيمه ويسبح ديمه نقاعـــه
حسيس طمبوراً ينقرش نقر فى قعدة رباعـه
وعذاب أماً تلاهيبو وجارى تملى دماعـــــــه
بكا الايام الخوالى وعروض المدن المشاعـه
وجماله المدهون مظاه]ر تلالى وزايفه خداعه
فجوره وأحلام صباها مجونه وهوسه وضياعه
وتقاليع غلبان يديره واللا يثنى إتباعـــــــــه
أصيل مانعاهو المبادىء يغابى يلم الجماعـه
وينوم ويمحن زمانو ويعيش الغربة فد ساعه
ضعيفاً لامن يسندو نحيلاً ماشى شمــاعـــــــه
وقسم من حالة هذالــو أخير أطفال المجاعــه
صبر فوق الجمر قنب ورويحتو تنازع نزاعه
وبخاف قبال يصد يرجع يكون أسمو غشه الاذاعه
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 12:00 pm

جنون الريد


احمد زول معروف بالطيبة حسن اخلاقه عليها اتربى
تكفى شهادة ناس الحلة انه خلوق وخجول ومربى
مهذب رغم حداثة سنه لبس تهذيب واصالة وهيبة
ادى الناس وادوه الحب حسن الظن بيناتهن شب
خشت فجأة اميمة حياته وصارت بينه وبينا محبة
قلبه اختارها عشان معروفة زولة حنينة وراقية وطيبة
دسو الريد فى السر بيناتن خلو حبيس ودفين ومخبا
وكيف تنضارى متل اشواقهم وليه زى ريدهم يوم يتخبا
بعد اعوام وصلتلو رسالة جواب مليان تقيل ومعبا
قبال يفتحو عرف الراسل وباينة وظاهرة رسايل وهبة
اخوه الليه زمن متغرب تسعة سنين قضاهن غربة
مرسل ليه تذاكر وفيزا دايرو يجيه هناك فى طيبة
طار فى الاول احمد فرحو كلم كل الناس بالصحبة
ولما اذكر اميمة حبيبته فجأة انتابه شعور بالهيبة
لكن قرر انه يسافر سرعة يعود ويتم الخطبة
لأنه الغربة طريقا قصير وفيها يهون تحقيق الرغبة
جاته اميمة حزينة توادعه جاته نجفف دمعه الكبا
جاته توصى عشان مايقوا وينساها هناك فى الغربة
جاته تطمنه انه حا يفضل ريدا الخالد مهما غبا
وحافظة عهود الريدة البينهم ومهما كان حا يظلوا احبة
ادته مصحف عشان يرعاه من العين والهم والكربة
لبسا عهد الريد فى جيدا عقد ممهور بصورة الكعبة
قامو اتوادعو زين واتباكو فات خلاها وحيدة وخبا
وسافر شال همو واحزانو بعد ايام فى المملكة صب
لاقو الناس يا زول كيف حالك بالاحضان قام سالم وهبة
قالو نصاح ناس امى وابوىمشتاقين راجينلك اوبة
قالو احمد سافر يا وهبة غير جوك وروق حبة
امك ياخ تلاهى عليك لا خالالا ضريح لا قبة
السودان مشتاقلك كله ضفاف ورمال وسواقى وتربة
وحتى النيل فرحان راجيك تجى وتنهل من مويته العذبة
بعد ايام كان وهبة هناك بين اصحاب واهل واحبة
فى حضن امه الطول منه فى حيشانه الواسعة الرحبة
فالتلو امه اخوانك كبروا ومافضل لنا زول يتربى
بس فضل لى اشوفو جديدك وكتين لسع حية وطيبة
اختارولو بنية سميحى تشع حيوية ورونق وهيبة
اديبة وراقية وكلها عفة وبرضو اهل وقراب فى الحسبة
يوم العرس الحى صباحى الفرح مطبوق والناس منطربة
وشاقى الليل صوت كم زغرودة وحس طمبور ودليبن رب
الا فى واحدة حزينة وباكية سايلة دموعا دوام منسكبة
خلف دموعا سؤال بيحير وفى آهاتا اسرار محتجبة
وقالوا الناس دى دموع الفرحة وغيرها شنو الحايكون السبة
بعد ايام ساق وهبة عروسه ساقا رجع لبلد الغربة
شايلو حنين لكل اصحابو ولاحمد اخوه اشواق ملتهبة
وصل الباب كورك يا احمد فتح احمد بلهفة ورغبة
شاف قدامو الما متوقع هم الكون فوق راسو انصب
شاف السلسل عهد الريدة نفس السلسل وصورة الكعبة
شاف قدامو اميمة حبيبته الكانت راسية وهادية وطيبة
شاف احلامو تضيع قدامو بعد ما كانت منه قريبة
كانت لحظة تفيض بالدهشة شاف الدنيا كأنها كذبة
كورك اميمة !! اميمة !! اميمة !! صنقع ودر دنقر وغبى
وجن احمد فى نفس اللحظة وجن الريد ما اظن ينطب
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 12:02 pm

خلاص مليت من الغربة


مليت من الغربه آعلى .. يا ولدى يا ايدى اليمين
داير الرجوع بس كيف يكون ... وتفكيرى فيهو انا من متين
كل ما اقول اصبر شوى باكر تكون الحاله زين
القى الظروف ياها الظروف .. بس زايده سؤ بحلف يمين
وآخد لى لفته على الزمان ... القاها مرت كم سنين
لمتيـــــــــن بتتفك القيــــــــود ... القاسى قلبها ما بيلـــــين
**********
جيت فاكر انى اكون سعيد ... بى مال بيجرى على اليدين
لكنــو مقسوم يــا لعــــزاز .... رزقا يكون دائمــا ضـــنين
والشئ العجيب مما وصل ولليلى فوق اكتافى دين
حســرة وهموم متواليات .... والدمعه يوت هالابه عـيــن
نيران مولعى فى القلب مسكين فقد لضرا الامين
كان عيشو هاديه قبل يجى ... و فى بيتو كان قوتو اليقين
والليله فى الاهوال دوام يصرخ ومو لاقى البعين
وينــك بعــدتى على ّ ليه ... وانا ليكــى كاتلنــى الحــنيــن
يا السمحه سموكى القرير والناس تجيك من وين ووين
وانا قـمــت منك شــن اقول .... غير ده المسطر فى الجبين
يا درة الوطن العزيز يا النادره يا لماليك وزين
عشمى ومناى ارجع واجيك ....... انا غير هواك متل السجين
داير اكون بين الاهل محضون وحاضن اعز طين
داير حياتى مع الصحاب ..... واللقمه ما بين العوين
***********
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الأربعاء أبريل 15, 2009 12:20 pm

بريدك يا امي


قبال ما يحصل الميلاد وقبال يستبين رسمي
وكت ساكن غيوم الغيب وطيفا في الخيال وهمي
اكيد جواك كنتا وجود قريب بالرغم من عدمي
ودعاك يا الله جيبو ولد يتم والفرحه لى حلمى
منو الغيرك بيمسح لى دميعاتي منو الغيرك بشيل همي
منو الزيك منو المتلك محال ما بلقي زي أمي
شغلتك تسعه فوق تسعه مقدره بي حسب علمي
نزلتا أنا من حشاك صارخ وبرضو صراخي كان حتمي
وفي لحظة وصولى ألم صبر الدنيا ما بيحمي
أنا لو كان لى فيهو خيار كان قطعتو من جسمي
منو الفند كلامي قبل أقولو واحكيهو من فمي
منو الترجم اشاراتي وترجم في السكات نضمي
منو اليا يمه سهر الليل عشان اتهنا في نومي
وما بيتحمل يتألم يشيل آلامو من ألمي
بعد تميتا عمري سبوع حسابك من ظهر نجمي
عليك اتلملمو الحبان عشان يختارو لى اسمي
يلازم عمري في الأيام ويبقي مع السنين وسمي
وكنتا وكت معاك ابسم تزيدي سرور وتبتسمي
خلاص تميتا سبعه شهور ولسه ما حضر فهمي
صغير دابي في الحبيان شويفع وما قوى عضمي
اتبتب لسه في التاتاي اشيل جسمي وسريع ارمي
وما بقدر خطاوي أسير لدن يا يمه كان عضمي
كبرتا مع الليالي عمر وبرضو معاي كبر حجمي
مشيت للمدرسه تلميذ وحاضن شنطتي وقلمي
اتعلمتا كيف اكتب واصور لحظة إلهامي
عشقتا الكلمة والأشعار سكبتا على الوتر نغمي
بريدك روحي يا يمه بتسري مع الوريد دمي
تضمدي فيني جرح الهم بلاك يا يمه كان يدمي
بشيلك زادي في الترحال وبرضو يقيني في حرمي
بتهملي يمه في نفسك ودايما بيه تهتمي
كان يا يمه ما بريت وآ اسفاي وآ ندمي
عشانك يا ملاك الكون بشد قوس الشعر سهمي
بريدك يمه غيمة خير وبي حنك علي تهمي
بعيشك دنيا في دنياي وحلمك يمه فاق حلمي
الرجوع الى أعلى الصفحة اذهب الى الأسفل
della
قسم رعاية المبدعين
قسم رعاية المبدعين


ذكر عدد الرسائل : 838
Personalized field :
اكسب مع ثلاثية روان : 13
تاريخ التسجيل : 09/04/2008

مُساهمةموضوع: رد: واحة الشعر السوداني   الخميس أبريل 16, 2009 2:45 am

كلمات الشاعر / عبد الفتاح عبد الرحمن محمد ( شايقي )

أعيشك من سكات

مابدخلك
وأنا في زقاقاتك حلم
مفطوم علي وعداً قضي
وقلباً سهي
وزمناً هوان
مابحلمك
وأنا في المنام
لسع بشطف خوفي من
طلعة بهاك
واخوفي
لو صحت الصباحات أفقدك
مابرسمك
وأنا أيدي في طين النوي
وعيوني من زحمة مخاوفك
تندهك
بقبل أعيشك من سكات
أفهم إجاباتك همس
أكسر دوايتي معاك عمد
وأقصد أحجيك بالغنا
ما الزيي لو خيل في رهان
مابتكسبك
........
بتوسلك
تدي المراكب ريح صلاح
تهديها كلما الليل دهم
ترمي الصباح قدام خطاي
تبريها في درب العشم
وأنا بنتظر غيمتك تصل
لو تنبهل في بور غناي
أنا ببقي في دنياك نغم
....
وأتحسسك
من تاني أبدا أحسسك
بالكان مدسدس في الفؤاد
بالكان محكر في القلب
من كم سنة
ريد ياحبيبة وكلو ليك
شوق للبريدة ومااكتفيت
غنا ياجميلة بيوصفك

ومن تاني ارجع أدخلك
وفي حلمي أقدر أرسمك
...
وإستأذنك
أدخل عليكي حلم جميل
أدخل عليك من ألف باب
من ألف شارع ضو جديد
...
بستأذنك
أبهل دوايتي عليك غنا
وأرسم ملامحك في الغيوم
ما إنتي لي أول سراب
وأنا ما إنجهرت من النهار
لكني بدفع ليك عمر
مافيهو غير الإنتظار
والحرقة والشوق الشديد
........
بستأذنك
أرويك فرح
وأشرق جداولك بالنشيد
وإتدفقك في كل صباح
وإتونسك كل يوم جديد
........
ياجاهلة مابي من حريق
ياصامتة والجوف بيك يقيد
سويني في بالك حلم
أو في خيالاتك مكان
تلقيني كلما الريح تنوح
مشرع بيديكي الأمان
.....
بستأذنك
ماتحزني
لا الغربة تسرق فرحتك
لو في بعادك كنت طيف
أشواقي ليك فرس الرهان
.....
يالجاية من ضو الشموس
وأنا في ظلامي عليك بكوس
لاكنتي زي نار المجوس
لابتشبهي الزيك كمان
.....
بتوسلك ماتسدي باب
أنا من دروب الريح بجيك
وإستأذنك
شان أدخلك
وأرسم ملامحك من جديد
عصفورة أو طفلاً سعيد
راكوبة أو ظلاً مديد
قمرية في غابة نخيل
طورية أو منجل في إيد
تمرة وشديرة برتكان
شادوف علي الجرف البعيد
خلوة وتسابيح في الآذان
إبريق وسبحة وكم مريد
وأستأذنك
شان أدخلك
وأبداكي من أول جديد

*********
الشايقي ابدع في الكلمات دي
مشكور يااشرف
**
وعندك بلد الغبش مبالغه
والعجب لما تسمعها من عبدالرحيم ارقي

اشعار تحفه ياكوفي
تسلم

_________________
هنـا مواضيعي ومشاركاتي
****

دا ماالقلب البجرسو شوق
اذا مااختار سميرو بعاد***ولا القلب التبكي حبيبه لو غابت عن الميعاد
***
دا ماالقلب البجرسو شوق
الا بيبكي لما يشوف بين الخلق في خلوق
ماخده طباعا من الغابا شايلا ضميرا ماشه السوق
***
وتاني بيبكي لما يشوف ما بين الحقوق في حقوق
نزلت من سماها ذلال وطارت من تحت لي فوق
***
قلب حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خاذوق
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 12:14 pm

مشكور يا دلة علي المداخلة الجميلة وفعلا الشاعر عبد الفتاح عبد الرحمن أبدع في هذا الوصف الجميل
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 12:49 pm

كتب الشاعر / معتصم الإمام

الغربة الغشاشة


يا غربه يا بكايه
يا غشاشه يا مستهبله
تغرينا بي درهم قروش
وراه قنطار بهدله
جيناك لي سنتين وبس
او قل تلاته نكملها
نلقى المراد ونودعك
نرجع حياتنا نبدلها
نبني البيوت في العاصمه
وبي كوم اثاث نجملها
وكرونه حاره نحضرها
اصلو التنقل مشكله
ونكمل الدين بي مهل
والسمحه جاهزه نحصلها
غير القروش اللي الأهل
عبر الشهور حنرسلها
والباقي يدخل في البنوك
نشوف زياده نشغلها
ناس فكرت تجني العلم
تبدأ الدراسه تواصلها
أحلام كتيره وشيقه
وآمال كبيره نأملها
لكن حساباتنا الغلط
في كل عام بنرحلها
مرت سنين من العمر
بنعزها وبنفضلها
والحسبه وصلت طاشرات
يمكن نعيش وندبلها
وتعال نحاسبك يا وهم
من غير رقم أو أمثله
كان للقروش نجري ونحوش
لكن تقول بنشاكلها
ما راضية تقعد في الجيوب
وتقول حرامي بينشلها
لكن بترقد في الضهور
بي ديون تقيله مطوله
ممحوقه ما نقضى الغرض
وأقل حاجه تكملها
كملانه بي حق الوزن
ومجاملات مستفحله
وضرائب أبعاج ندفعها
وإلزامي حمدي نحولها
وأحلامن صبحت زي سراب
نمشي ونجري وما نحصلها
يا ريت يكون هم القروش
يا غربه فيك دي المعضله
لكن تعال شوف الهموم
الماأفتكرنا نقابلها
شغلانه شاقه ومؤلمه
ودايما تكون مستعجله
ما عاد يكفيها النهار
تحتاج ليالي مليله
أمراض كتيره بدت معاك
قبل الألم تستسهلها
ناس الضغط والسكري
وفوق القلب وجع الكلي
مصران وقرحة وإكتئاب
ونفوسنا ما متحملها
وبقينا فيك كيمان لحم
تحت الهدوم متندله
وأكيد يكون أكل العلب
وأكل المجمد عاملها
عدم الرياضه مع المشي
لابد يكون ليهم صلة
وكمان تعال لي معادله
ما قدرنا أصلو نعادلها
سجن العيال جوه الشقق
ولا الفراق للعائله
في كل طرف تلقى القرف
تلقى الخيوط متداخله
جيب العيال بي جيبنا مال
جيوبنا غيرو مميله
وصغارنا صبحت بالزهج
متوحشه ومتجفلة
لا قادرة تلعب في الخلا
لا ظل شديره يظللها
تلقى الولد غالبه الكلام
والبنت كبيره مريله
كل الضغوط جاتهم سوأ
وما قدرنا حتى نقلله
أما الفراق اصل الوجع
ومشاكله بايته مقيله
كل زول مفارق عارفها
وما أظن في داعي أفصله
يا غربه أدينا كتير
أدينا خاطرك يسهله
خلينا نرجع بالفضل
نلحق حياتنا نعدلها
آمالنا فيك بدري أتنست
ألا الرجول متوحله
وبقينا زي أهل الغبور
لا البره عارف الداخله
لا الجوه برجع لي ورا
ويحكي الحقيقه ويوصله
لكن خلاص هان الخلاص
عدك نزل مهما علا
وإن شاء الله نحيا نودعك
وعدك نزل مهما علا
ياغربه يا بكايه
يا غشاشه يا مستهبله
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 12:51 pm

رد الشاعر ابراهيم السنوسي علي شعر معتصم الامام بهذه الابيات




الناس هناك
الغربه لا بكاية
لا غشاشه لا مستهبلة
الغربة أحلى من القعاد
في بيت أخير منه الخلا
الغربه يا أخ معتصم
لوكان بديتها من أولها
كان جبت ليك كيمان قروش
بطلت كتر الململة
ناس كتار خموا الريال
من غيرتعب لا بهدلة
ناس راكبه سيارات جنان
آخر موديل ومعدلة
وفي ناس عشان كتر القروش
أكلوا الرغايف متبله
وريني يا أخ معتصم
مالك أثرت المشكلة؟
ولا الوجع وصل الكلى
أصلو الوجع وكتين يزيد
يشطب عقولنا يقفلها
الغربة حلوة شديد وبس
عايزه البعرفوا مداخلها
تحسب غلط تخسر كتير
ما تلقى حاجة تحولها
كل القروش ضاعت غلط
مافيش حرامي بينشلها
أحسبها صاح تضحك معاك
تديك حريرها ومخملها
خت الريال فوق الريال
تلقى المصاري متندله
أهلك هناك راجين رضاك
شيكات وعدت ترسلها
الدولار هنا...علبة دخان
وهناك بحل المعضله
يامعتصم جاهد كتير
الحالة ما مستحملة
لو الدوام ما بكفي ليك
ضاعف جهودك ودبلها
ما تقول تعبت من الجري
تمم جمايلك كملها
طول الوكت بس تشتكي
ما هو دا الجاب لينا الجلا
شوف ناس فلان لموها كيف
وبلدنا زادت في الحلا
جابوا الكتير ما خلو شيء
من الدهب للمريلة
اللاندكروزر في النهود
والمرسيدس في دنقلا
وفي ناس نست طعم الحياة
وضحت عشان العائلة
البيت وقف شامخ عنيد
والاسرة تحته مقيلة
حتى الرجع ما عندو شيء
راكب كورلا مدنكله
يا معتصم خليك معاي
نحن الفي أيدينا المسأله
لازم يكون فينا الصمود
ونخلي عيشة الهرجله
الناس هناك تعبت شديد
راجيانا نحن نوصلها
ولازم نكون أخوان بنات
والحرب لسه في أولها
الماتش لسه حيبتدي
والكوره حاره مجلجله
ولازم جماهير الفريق
تطلع سعيدة مهلله
حتى التعادل ما بفيد
أما البطوله أو الخلا
يا معتصم أسمع أخوك
العاش سنين في تلتله
عانينا زيك شان أسرنا
تعيش تمام ليه أنت لا؟
عانينا زيك شان أهلنا
يكونوا فوق في العلا
في الغربة ناس كانت ملوك
وأسر عريقة مؤصلة
عرفوا الشقا ووجع الحشا
في الغربة من غير ململه
ما الغربة هي خشوم بيوت
ما كل أنسان بحملها
لكن عشان ناسنا الهناك
لازم نعيش البهدله
لو عدنا بي خيرا كتير
بنعيش حياتنا نواصلها
أومتنا في غربة ديار
بنكون عملنا محاوله
الرجوع الى أعلى الصفحة اذهب الى الأسفل
الشيخ فرح
مشرف تقنية الكمبيوتر
مشرف تقنية الكمبيوتر


ذكر عدد الرسائل : 2693
العمل/الترفيه : كل ما يتعلق بالكمبيوتر
Personalized field : زاهـر الطيب بركات
اكسب مع ثلاثية روان : 10
تاريخ التسجيل : 19/02/2008

مُساهمةموضوع: رد: واحة الشعر السوداني   الخميس أبريل 16, 2009 12:57 pm

واحة جميلة والله

مدخل الواحـة بالشعر القصصي الواقعي والذي أهواه كثيرا

مملؤ بالعبارات القديمة التي عشقتها

ولو بتدوري احكيلك كيف أحوالي في البندر ،
مـــن ويـــن عـايـزة ابـدالـك ؟؟
مـــو شـيـتـا غـريـب وعـجـيب
ده شـيـتا كـلـو شـيـن فــي شـيـن
هــنـا الـــزول الـعـديل ونـصـيح
وحــاتـك انـــت يـــا الـغـالـية
بـــعـــيــش حـــيــاتــو...‏
يــومــاتـي بــــي وشــيــن..‏
وزولــتــي الــحـتـي حـبـيـتها .‏
لـقـيتها بــراي ، تـحـب زولـيـن

وحقايق فعلا حاصلة .....

====

اشكرك وساكون ضيفا يومي في هذه الواحة الظليلة لاستجم فيها واشم فيها طين بلدي واشرب من نيله وامتع نظري لطبيعتها وأشجي بصوت امي الحنية وكل اهلي .

تقبل مروري
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 1:18 pm

مرحبا الشيخ فرح منك واليك نستمد الابداع وانت اضافة جميلة لما لك من تذوق للفن فمرحبا بك وبمرورك الرائع
الرجوع الى أعلى الصفحة اذهب الى الأسفل
الشيخ فرح
مشرف تقنية الكمبيوتر
مشرف تقنية الكمبيوتر


ذكر عدد الرسائل : 2693
العمل/الترفيه : كل ما يتعلق بالكمبيوتر
Personalized field : زاهـر الطيب بركات
اكسب مع ثلاثية روان : 10
تاريخ التسجيل : 19/02/2008

مُساهمةموضوع: رد: واحة الشعر السوداني   الخميس أبريل 16, 2009 1:25 pm

ashrafbrkat كتب:
رد الشاعر ابراهيم السنوسي علي شعر معتصم الامام بهذه الابيات




الناس هناك
الغربه لا بكاية
لا غشاشه لا مستهبلة
الغربة أحلى من القعاد
في بيت أخير منه الخلا
الغربه يا أخ معتصم
ما الغربة هي خشوم بيوت
ما كل أنسان بحملها
لكن عشان ناسنا الهناك
لازم نعيش البهدله
لو عدنا بي خيرا كتير
بنعيش حياتنا نواصلها
أومتنا في غربة ديار
بنكون عملنا محاوله



اقول ولست بشاعر ارد على الاخ السنوسي

يا سيدي اقيف الحالة صعبة ما بنحملا
نعم نضحي من اجل الاهل
لكن لمتين القصة بقت مسلسلة
والبطل أخـوك المغترب
كل المشاهد عاملا
يعاني في الليل والصباح
والحالة ما مستعدلة
بطولة ساكت في الهوا
في الاخر اصبح جيفة مهملا
رجع البلد ملان قروش
لكن لي علاجه يكملا
ايوا رجع المرض المعاه
ضغط وسكر وصحة مبهدلة
ولقى العلاج فوق في السماء
راجين نعاين للبنزلا
كايس مشروع يستثمروا
يحفظ قريشاتو من المصاريف والتلتلة
قروش ما حلاوة قطن
تاسيس يالله يكملا



*****

عفوا جاني تلفون شتت افكاري


عدل سابقا من قبل الشيخ فرح في الخميس أبريل 16, 2009 3:53 pm عدل 1 مرات
الرجوع الى أعلى الصفحة اذهب الى الأسفل
ashrafbrkat
مشرف تقنية الكمبيوتر
مشرف تقنية الكمبيوتر


ذكر عدد الرسائل : 1551
العمل/الترفيه : Kam Air Service
Personalized field :
اكسب مع ثلاثية روان : 2
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 1:31 pm

محاولة جميلة وأكثر من رائعة الشيخ فرح يلا ابدع واقفل تلفونك لما تجيك الخواطر ..... وجني وجن تقبل مروري
الرجوع الى أعلى الصفحة اذهب الى الأسفل
السكرتيرة
سكرتيره إتحاد المرأة
سكرتيره إتحاد المرأة


انثى عدد الرسائل : 1292
Personalized field :
اكسب مع ثلاثية روان : 4
تاريخ التسجيل : 22/05/2008

مُساهمةموضوع: رد: واحة الشعر السوداني   الخميس أبريل 16, 2009 2:30 pm

رائعة الرائع عبد الله محمد خير

والفنان الكبير صديق أحمد


أنا المعجب


أنا المعجب
أنا المشتاق أشوف عينيك
كل صباح واتعذب
وأسمع من شفاهك ديل
ألذ نغم برأى أطرب
وتلوح لى فى صفاء عينيك
بحور من ريد ... أدور اشرب
ومرة اتوه ... اقيف مشدوه
اقول يا عـــبدو أتــــادب
زمـــــــانك فــــــات ..
والــــريد فى قليبك مات
ليه فوق جـــمرو تتقلب
واشيل مـــــن عمــــرى
عشــــرة ســـــنين
اقول يمكن يكون انسب
وأدلى دلوى مع الخطاب
مع العشاق يجوز اكسب
وأعاين لى عيونك يمكن القى سعادة
القـــــى غضــــب ...
واشيل فوق راسى هم الدنيا
فوق افكارى يترسب
قلبى رهيف
ما خاض زى حروبك ديل ولا جرب
وفجأة يعود صوابى الغاب
أشوف انا نفسى جنبك زى وليد يلعب
بيجرى وراء سراب ورهاب
بعيييد...................لليلة ما قرب
وهل مـعقول ..!!!
يكون فى وصول ؟
متين يا رب ..؟
ما تصارحيه ........ خافى عليهو
قولى ليهو لا يتعب
انا المعجب
انا الولهان ولى سنين
بعانى من الصعاب أصعب
وقالوا على كبرت خلاص
ولسع ماقدرت خطب
انا المعجب
انا المشتاق .......
انا الطوالى بترقب
انا التائه
وعيونى بلاك ما شافت
يمين كوكب
شوية ريده
ليه يا صيده
ما دا انا المتيم تب
الرجوع الى أعلى الصفحة اذهب الى الأسفل
السكرتيرة
سكرتيره إتحاد المرأة
سكرتيره إتحاد المرأة


انثى عدد الرسائل : 1292
Personalized field :
اكسب مع ثلاثية روان : 4
تاريخ التسجيل : 22/05/2008

مُساهمةموضوع: رد: واحة الشعر السوداني   الخميس أبريل 16, 2009 2:32 pm

تحياتى اشرف ومشكور على البوست الرائع وتقبل مشاركتى ولى عودة

تقديرى
الرجوع الى أعلى الصفحة اذهب الى الأسفل
karber
مشرف التسجيل بالمنتدى
مشرف التسجيل بالمنتدى


ذكر عدد الرسائل : 1665
Personalized field :
اكسب مع ثلاثية روان : 9
تاريخ التسجيل : 12/03/2008

مُساهمةموضوع: رد: واحة الشعر السوداني   الخميس أبريل 16, 2009 4:20 pm

واحة جميلة والله ,ومشكور اشرف

_________________
karber
******

هنا مواضيعي ومشاركاتي
الرجوع الى أعلى الصفحة اذهب الى الأسفل
della
قسم رعاية المبدعين
قسم رعاية المبدعين


ذكر عدد الرسائل : 838
Personalized field :
اكسب مع ثلاثية روان : 13
تاريخ التسجيل : 09/04/2008

مُساهمةموضوع: رد: واحة الشعر السوداني   الجمعة أبريل 17, 2009 1:58 am

وتعال نحاسبك يا وهم

من غير رقم أو أمثله

كان للقروش نجري ونحوش

لكن تقول بنشاكلها

ما راضية تقعد في الجيوب

وتقول حرامي بينشلها

لكن بترقد في الضهور

بي ديون تقيله مطوله

ممحوقه ما نقضى الغرض

وأقل حاجه تكملها

كملانه بي حق الوزن

ومجاملات مستفحله

**********
جميل ياشرف
الشاعر معتصم الامام
ميز الغربه ميز جد
وبالغ في
ماراضيه تقعد في الجيوب
اتقول حرامي بينشلا
كوفي يا مبدع
تسلم ومذيد من الروايع

_________________
هنـا مواضيعي ومشاركاتي
****

دا ماالقلب البجرسو شوق
اذا مااختار سميرو بعاد***ولا القلب التبكي حبيبه لو غابت عن الميعاد
***
دا ماالقلب البجرسو شوق
الا بيبكي لما يشوف بين الخلق في خلوق
ماخده طباعا من الغابا شايلا ضميرا ماشه السوق
***
وتاني بيبكي لما يشوف ما بين الحقوق في حقوق
نزلت من سماها ذلال وطارت من تحت لي فوق
***
قلب حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خاذوق
الرجوع الى أعلى الصفحة اذهب الى الأسفل
السكرتيرة
سكرتيره إتحاد المرأة
سكرتيره إتحاد المرأة


انثى عدد الرسائل : 1292
Personalized field :
اكسب مع ثلاثية روان : 4
تاريخ التسجيل : 22/05/2008

مُساهمةموضوع: رد: واحة الشعر السوداني   الجمعة أبريل 17, 2009 1:29 pm

حــــــــــــبي أنا ليك كان زادي

حبي أنا ليك كان زادي وكان جوه الحنايـا دفيـن
كتّ بضاري من الناس وخايفه عليهو مـن العيـن
عليهو كت بصوم وافطر عليهـو بكابـد الناريـن
كت بحسب سنين الغربة لما تعـود تجينـي متيـن
وكت برجاك فوق النار لمـا وكـت لقانـا يحيـن
نونس في براءة أطفال وفى الحب نروى ننهل زين
وكلما يوم يزيد البينـا لمـا بقينـا قـاب قوسيـن
اتاري أنا كت فيك مخدوعة وكم من زي مخدوعين
ما قايـلاك حبيـب آلاف وقلبـك قبلـه للضاليـن
وما قايلاك بتنسي حبيب صبر راجيك ستة سنيـن
وساهر كم ليالي طـوال يتقلـب شمـال ويميـن
كيفن يهون عليك تنساهو زولاً كان عليـك حنيـن
وتشغـل بالـك الأشـواق لمّـن تزبـل الياسميـن
كت دايراك بسمة عريضة في وجه الزمان الشيـن
وكت دايراك ساعة الحاجة تبقى ليّ دخري خزيـن
كت دايراك مقنع حوبة وكتيـن المضـارى يبيـن
وكت دايراك فارس احلامى تشاركنى ونتـم الديـن
وكت دايراك أمل بسام يزيل ألـم البعـاد والبيـن
كت دايراك شريك الروح واخدمك حافيـة القدميـن
وكت بحلم بك انت معاي مجرتق بالعديـل والزيـن
جنبك في يمينك قاعدة نسمع في دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبه الموج أكيد مرسايا بين موجتين
وداعاً يا زمـن ظالـم وبالأفـراح علـيّ ضنيـن
وداعـاً يـا قلـب قاسـي لا بيحـن ولا بيلـيـن
وداعاً يا سراب خداع محال ما بيروي عطشانيـن
وداعاً يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن
تبشر بي خريف جايينا ياما الناس رجوهو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك يا قلبي المسالم وديمه طبعو حنين
يتاورو الشوق ويلعب بيهو تنحر في حشا السكيـن
تعاودو الذكري تنتر جوا حالـو يحنـن المسكيـن
أخيراً منى ليك سلام وقبل ما تجـف دمـوع العيـن
وقبال منى ما تعـدى وقبـال الفـراق مـا يحيـن
بخيت وسعيد عليك إن شاء الله يبقالك عمار وبنيـن
وقلبى أنا خلى فى أناتو بعدك يامـا راجي أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحــب عليك حــرمان ووعــد الحـــر أمــانه وديـن
الرجوع الى أعلى الصفحة اذهب الى الأسفل
السكرتيرة
سكرتيره إتحاد المرأة
سكرتيره إتحاد المرأة


انثى عدد الرسائل : 1292
Personalized field :
اكسب مع ثلاثية روان : 4
تاريخ التسجيل : 22/05/2008

مُساهمةموضوع: رد: واحة الشعر السوداني   الجمعة أبريل 17, 2009 1:35 pm

حبيبة عمري
حبيبة عمري ..تفشي الخبر
وذاع وعم ..القري والحضر
وكنت أقمت..عليه الحصونَ
وخبأتُه من فضولِ البشرْ
صنعت له من فؤادي المهاد
ووسدته كبدي المنفطر
ومن نور عيني نسجت الدثار
ووشيته بنفيس الدرر

وقد كنت أعلمُ أن العيونَ
تقولُ الكثيرَ المثير الخطر
فعلمتها كيف تخفي الحنين
تواريه خلف ستار الحذر
فما همَسَتْهُ لأذن النسيم
ولا وشوشته لضوء القمر
ولكن.. برغمي تفشي الخبر
وذاع وعم القري والحضر
حبيبة قلبي وهل كان ذنبي
إذا كنت يوما نسيتُ الحذر
ففي ذاتِ يومٍ رقيقِ النسيمِ
كثيرِ الغيومِ، قصيرِ العمرْ
ذكرتُ مكانا عزيزا علي
وأنتِ به وأنا والأُخر
ذكرت حديثك ذاك الخجولَ
وصوتُك ينساب منه الخفرْ
تقولين ماذاتقولين ويحي
وهل كنتُ أفهمُ حرفا يمرْ
ولكن برغمي تفشي الخبر
وذاع وعم القري والحضر
….
تقولين ماذا تقولين ويحي
وهل كنت أفهم حرفا يمر
فصوتك كان يهدهد روحي
ويحملني في جناحٍ أغر
يحلق بي حيث لا أمنياتٍ
تخيب ولا كائناتٍ تمُرْ

وهومت حتي تبدّي أمامي
ظلامٌ رهيب.. كفيفُ البصر

وقفت عليه أدقُّ الجدارَ
فما لانَ هونا .. ولم ينشطرْ

فعدتُ تذكرتُ أن هواك
حرامٌ علي قلبي المنكسر

حبيبة قلبي، وهل كان ذنبي
إذا كنت يوما نسيتُ الحذر؟
الرجوع الى أعلى الصفحة اذهب الى الأسفل
 
واحة الشعر السوداني
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 2انتقل الى الصفحة : 1, 2  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
dibebaonline :: اللغة العربية والشعر بأنواعه والوانه :: الشعر الفصيح منقول أو تاليف الاعضاء :: شاعر وديوان مكتبة الشعراء-
انتقل الى: